Sve bilo je pomorsko dobro
 

Evo nisan nego doša u Korčulu, otvori suncobran, ka me kontraje jedan Korčulanin govoreć mi kako je grad od kad me nima, ćapa mrak. E hti san mu ispripovidit otka je Korčulu ćapa mrak ma mi je lakše to napisat, nego po putima pripovidat. Gledan ga i mislin se jesan se triba tiskat na izbore za gradonačelnika, pobidit druga Mirkota i donit svomu gradu svitlost, oli ostat ode i pisat ko i prin sve o ludorijama vladajućih sekretari u Poglavarstvu.

I sad ka smo okolo mraka, vaja reć i mene je, a ne samo Korčulu ćapa mrak i to ka san se iša kupat ova dva dana na Banje. Tako san se najidi na druga Mirkota da mi još kuha. Nisan se nada da ću se ovako iznervat, pa će mi tuka ove dane zvat mrske novinare(reka bi Maki, čak iz Zagreba) da slikaju i napišu kako se korčulanski gradonačelnik ponaša prema jedinoj pravoj plaži u gradu. Onoj na Banje. i ko za vraga, ope ove dane u novine čitan kako su dubrovačke Banje jedna od najlipših gradskih plaža na svitu. Ma je što će mo govorit, samo nisu starije od ovih naših, a bome ni lipše.

Za reć pravo naše su Banje ne samo lipše, nego po mišljenju druga Mirkota imaju pravo bit i šporkije. Ni mi jasno, u pogledu čišćenja, koja je razlika između Banja i Plokate. Ako su Banje cile oli samo dil, pomorskega dobra, ni me briga, jerbo to ne znači da se oti dil grada ne drži čisto i uredno. To mi doje bit kako da vidin susida di je zaboravi, oli mu ispale dvi vriće smeća, pa hi nebi maknu sputa da ne vonjaju.

Može bit on to ne čisti zato što je prin puno godina zazva u Korčulu Šurbeka, a as Vlaški Primorca da s Banjama igraju ping pong, pa je u nerješenu partiju debji kraj pripa Banjama. Ko će ga znat, ali vidit je kako je to bokun korčulanske periferije, koja druga Mirkota ne zanima, oli tamo nika ni bi.

Ja samo znan da bi mu svo ono smeće i nered tribalo skupit u jedan saket i donit pri Općinu pa neka se žali komunalnemu redaru.

Eto, tako ja ode poručijen drugu gradonačelniku Mirkotu neka što prin sredi dil grada Korčule koji se zove Banje, na koji se on ni nikad kupa niti bati picigin a bome ni igra na dupine. Sramota da je stari Korunić iz nesvrstane Zanbije drža sto puti urednije Banje nego naš drug gradonačelnik koji redi javne površine samo ako se od njih u proračun peška koji solad. Grad Korčulu je svojon politikon i u suradnju sa svojin partijašima dove na sliku i priliku jednega Abiđana oli najgorega buvljaka u Kalkutu. Našto sliči Korčula u pasu okolo grada i na ulazu ugrad slobodi me bože, a ne znan kolika je ta rupa u proračunu ka se toliko tih bužakuluni nazovi butiga dogodilo u gradu. Tuka će mi pogledat doma jesan li dobro vidi da u kuću nima nijedna butiga. Ko zna, može bit da nisan dobro senja, pa i u mene u tinel rabota koja suvenirnica, oli pičinarija.

Ali nima straha za Korčulu, jerbo ovako izgnjusetani grad može priko reda uriškat u velevridnu fameju Uneska, na obični mig. Dakle neće Mirkotu bit potriba pisat molbu, nego samo namignut i Unesko će momentalno strovalit miljune dolori koje će naš gradonačelnik, magistar i ovi posrnuli asi u sekund posijat za svoje markopolancije i slične monade po gradu. A da ne zaboravin i dat koju kunu za Coce-fest, jerbo se i ta kulturna manifestacija triba pomomoć, kako bi promicala pismu, vino, cunpanje i vazdan spremne korčulane za trpit ludorije u svoj grad..

E sad za provat dobro vino triba se pripustit gusto načičkanin restoranima iza grada kojih ima u tolikemu broju, da mi pari kako u Korčulu dohodu samo gladni turisti iznemogli od tramaka na putovanju do našega malega mista.

Evo deboto san fini ove rede, kad pasaje susid, staje pod suncobran i u ćakulu mi govori kako će apena, (pazi ovo) as Vlaški dat Mirkotu štafetu od Banja pa će hi on uredit i dakako pagarešto na krnovala s mosta pod Menzu skočit.

Možebit ja ne znan zakonske regule o pomorskon dobru, ali ni mi jasno kad je to Noćno poduzeće peškalo ote Banje i s kojin je to bilo zakonskin moton. Na kraju moran rastrit još dva tri suncobrana po gradu da mi kojigo Korčulani iz Mirkotove partije doje ispripovidit hoće li se sovon boton rješit i pomorsko dobro na kojemu je palača Gabrielis, oliti Gradski muzej, pa misli li se rješit i pomorsko dobro na kojemu počiva restoran Liburna, onda što će bit sa onin pomorskin dobron kojega kaparaje gospoja Žuva i svojon monumentalnon lipoton slučajnin turistima čini traume na možjane dok se pitaju di su ovo došli. A bome bi lipo bilo da se razmrsi i pomorsko dobro na dizel placu, oliti bus kolodvoru i zavrne ga se vanka grada, pa još k temu i da se rješi pomorsko dobro na kojemu je rastrta palača Arneri. Tad bi bilo male šanse da budemo i daje zalud grad, ali s ovima iz partije opasnih namjera i drugon Mirkoton koji sad raspliće sve grope oko novih pravila igre sa gradskin vijećen, bome nećemo peškat asa. i sad da me kogo nebi shvati doslovno, nemo da se dogodi ka mu žena reče da gre zalit u vrtal pamidore, da on reče kako ne može jerbo su na pomorsko dobro, oli skupit masline, oplivit lozje, pa da mu skuža bude pomorsko dobro. Žene i punice, ne obadajte hi jerbo vas taki linčine zamantaju i lažu.

Za sve ovo gori riješit, a buduć mi se ko lajt motiv po tekstu plete pomorsko dobro, pari mi se najboje bi bilo da vuk bude sit i partijci na broju, da se poglavare s jednin leuton izvede na pomorsko dobro blizu Bisaća i tamo ostavi dok mi ne nacrtamo ova sva pomorska dobra u gradu. Paka hi zazovemo nase i posidnemo na prvi sat predmeta kako mislit Korčulu. Sudeći po dosadšnjima dilima, svi bi mogli dobit plus jedan iz zalaganja.

Slobodan Suncobran, 23. srpnja 2009.