Nikidan je Korčula strašno ponižena. U američki magazin Forbes, otok Hvar je proglašen najseksi otok na Jadranu. Tako je uvršten u bratovštinu seksi škoja na svitu di spadaju Havaji, Maldivi, Ada ciganlija i drugi. Judi moji koja kvaka, neistina, laž, ma ko se samo to usudi reć i di in je pamet?

I zato Korčulani, Blaćani, Lučani i svi drugi, pobunite se odma i to žestoko, pa lipo recite svitu di su najveća jahala, galebi, labudi lunbrelaši i ostale operušane tice zavodnice. Da je samo senjat kojemu je to neznalici palo napamet zaobać Korčulu i proglasit Hvar najseksi otokon na Jadranu. Ne znan, samo mi se čini da smo svi na škoju malo zaspali i pustili da tamo niki bezveznjaci u svitu otok pučana i buntovnika proglasu seksi škojon. To ne može bit.

Prvo i prvo nas je na Korčulu deboto osamnaest tisuća duša, a Hvarana jedanaest ipo. To odma govori, budući je njihov hvarko dugi i veliki, da smo vazda bili veća jahala i deleko užeženiji od njih. Drugo kroz povijest bi svaka nevoja i dušmanin prvo smantava nas, pa njih. Bili smo vazda prin na udaru, e ali da sad ne pridikan ko, što, di i kako, meni se pari da su oni kroz vrime peškali nike stvari boje od nas, a napose što ih je veliki Grga usadi odma cuncu na kolina. Tamo se oni u duru sunčaju već toliko godišć i niko ih ne zadije.

I sad, da se ne ponavjan, jerbo san prin tri godine pisa o Hvaru, hoću reć da je to bitna razlika između nas i njih. Oni se senpre okriću i sunčaju na suncu, a mi vazda cikvantamo u hladu Pelisca strašnega.Tu je ta velika razlika i odma je jasno i neznalicama da oni koji je na suncu odma je seksipilniji, jahabilniji i što sve ne. Tu su odma asocijacije na lavandu, more i seksi prigovaranje.

Eto ja mislin da su nas tu zajebali, a da ne govorin što su uvik imali porat u Splitu, a mi nigdi.

Onda doje bit i normalno da sve što činiš kroz povijest je seksi i jahabilno. Naprimjer, doju Mlećani na Hvar, donesu malo kulture, krejance i napretka, a oni tres po njima i udri činit bunu, što je dakako oduvik bilo seksi. Mi Korčulani se deboto nikad nismo bunili, a to ni seksi i draže nan je bilo fumat što drugi blesaviji od nas zamotaju. Slično je i danas, naročito u novije doba.

Nama Korčulanima je strašno seksi bilo prigrlit neke tuje pseudo političke blezgarije, ala jugoslavenstvo, orjunašiju i slične pizdarije. Te su opcije ka čovik boje promisli i biološki čaknute. Meni je to mužika bez parte, blejanje ovaca u mraku. Dakako rezultat je poznat i uz strašne žrtve, ma je bilo više i vrime. Ali navijat kontra svoga nama je bilo seksi i to nikima s velikin J. Posljedice tega seksa su i danas blizu nas i dobro poznate. To je zdravemu čoviku za spišat gaće od smiha. Sićan se prin petnaest godišć došli četnici pod Ston, a naš će jedan mišćanin, inače seksualno osviješten, onako za sebe da ga svi čuju; A što se sad pačaju, kad je došla JNA, samo će ćapat po tintari.

Eto ta mi je seksi rečenica ostala u pameti i nas na Korčulu uglavnon beside tega tipa činu puno seksipilnijima od drugih otočani na Jadranu. Malo je tako napaljenih škojari na svitu ko što smo mi. Parimo otok jubavi i seksa, niko s nikin ne govori a tad dohodi do najuzbudljivijega seksa.

... nastavak slidi.

Slobodan Suncobran, 27. lipnja 2006.