| Galioti
Evo ti ga na. Korčula polako, ali sigurno postaje grad Marka Pola i tu je više niko ne može fermat. Zalaganjen Međunarodnega centra Marko Polo triba bi se u Korčulu nagradit brod, oliti nikakva replika galijuna kojin je zapovida Polo ka se bori za Veneciju.
Za reć po duši u oti đir ima puno za veslat, ma ako na ti galijun bude zapovida Mihajlo, kapetan iz Žrnovske banje, ja nebi o šuca voli izist tu argo juhu. Gre li se stvarno na ti put i kanu li ti iz Centra pasat puntu od Lovišća, vajalo bi ih zamolit da usput učinu koje dobro dilo, apozito za napaćenu Korčulu. Recimo neka u štivu vazmu baren kojega poglavara i neka ga pokažu gori u metropolu, jerbo je za našin političarima gori nastalo velo zanimanje i judi ne viruju da se najveći azijski jahalo i skitalo Marko Polo ni rodi u Korčulu. Ma je sto posto jerbo baš grad Korčula ukažije svojin motima i incijativama koliko je u Aziji koliko ni u Hrvatsku i kako je briga samo za simboliku marko polistiku, moreškavanje igrice i ludorije. Onu stvarnu bit i važnost pravega korčulanskega mota i kulture neće pokazivat i u ti đir solde iskat. Ma vraga to triba sve zatajit, zapustit i na igre se bacit. Draga naša Hrvatska državo, molimo te da nan što prin učiniš muzej i kuću Marka Pola, unutra je lipo opremiš, pa ćemo je mi lipo za strance otvorit i ulaznice naplaćivat. Ali to ni sve, molimo te ako imaš još koji solad nagradi nan i Markotovu ratnu igračku , galijun, pa ako triba i mi ćemo u nju veslat i Đenoveze peštat. I na kraju kralju Ronpunjalo, molin te nemoj ko i lani kjuč odgrada Mirkotu vratit, nego ga umore vrzi a mi ćemo ga izronit i bojemu od njega poklonit. Slobodan Suncobran, 24. siječnja 2006. |
Ala dobro ideja ni
loša, samo hoće mi kogo reć što je to Međunarodni centar M. Polo. Jeli to štogo oko
bedara, pupka, oli je to koji bokun za izist. Ja naprosto ne znan i da me ko pita jeli to
institucija, udruga, oli je to koji OOUR noćne zajednice, nebi zna odgovorit. Niki govoru
da je to zaklada i da su digli bunu kontra Duke i ovin projekton mu hoću defešta vazest
Marka Pola. Doša mi je pod suncobran jedan prijatej i reka da se ti tamo nesritni centar
dogovori s Markoton da jedne noći kroz punistru uteče od Duke uđe u njihov galijun i da
će ga lipo odnit drito u Zagreb i smistit u Ministarstvo kulture. Tako su se potajno ti
Centristi dogovorili s onima gori i govori se da je Markotu tamo i misto, baren dok mu se
ne učini vajano kuća.