Finili izbori u lepoj njihovoj. Virovali, oli ne, pobjedili su Otpisani Tihi i Prle. Šešelj je Tihi, jerbo je utihnu, a Prle je oni Nikolić što ga je zamini. U ovu rolu in je neprijatej narasta i ni samo Njemačka, nego cila Evropa. Tako je to kad ratuju Otpisani. Njima je neprijatej uvik strašan i veliki. Srbija je od raspada zemje Brdovite imala gadnih neprijateja. Tu u prvi red spadaju Amerikani, koji su hi abrumali bonbama i polatili iz Kosova, onda Ujedinjene nacije i najgori neprijateji smo in bili mi. Naša vojska je natirala njihove tenkiste da postanu traktoristi, a generale da budu klošari. Sa za reć pravo ni svi naši generali nimaju mira, ali sudeći da nan baretu kroji bagra iz Rimskega kluba, čudo da je i ovako.

U Korčulu su Otpisani bili puno popularni i to toliko da smo pomalo počeli sličit na te prvoborce i komunjare beogradskega podzemlja. Korčula je toliko otpisana da se to, a zna se, mora pripisat našin vrlin Asima. Dakako i oni sliču Otpisanima. Javno se ne družu, ćakulaju na mote, konspirativni su, partija jin je u fundamentu i na kraju krajeva, od njih najviše stradavaju Njemci, jerbo hi je u Korčulu sve manje i manje. Eto sličnosti.

Asi su zapravo naši Otpisani i senpre nan ukažiju kako bit najotpisaniji na Jadranu. Najviše je otpisivanja bilo u privredu, točnije u turizam. Naša Tri asa su godišćima pomagala da se otpiše turizam, a upišu noćenja i slični livi elementi u tu granu privrede. Naša otpisana Tri Asa su četvrtin od Pameti složni su u markopoliranju Korčule, di se kanunima iz topova hoće prisilit ove turiste da poviruju kako je i Polo bi jedan As. Izmišlja se scenografija sparaje u Đenoveze, vržiju soldi a o tega ništa. Jedina je razlika što mi umisto dva, imamo četiri Otpisana, a to zato da Njemci mogu boje ćapat što hi gre.

Ali brige naše Ase za Njemce, ka bi brzo mogli dolanpat Amerikani. Pitate zašto. Eeee, zato jerbo su objavili mediji kako je jedna ugledna američka modna koća izvrgla liniju, nazvavši je po Hrvatskin turističkin gradovima. Odma ću prić na stvar i reć kako su po Hvaru nazvali kapot, jerbo se to radi učestale studeni i sniga na Hvaru i slaže, a po Rovinju su nazvali konbinet. Po Splitu majice, a ne virujen da su po Ugljanu nazvali košuje.

I konačno po Korčuli su, pogađate, nazvali mudante i to se razumi zašto. Koliko su naši političari, Asi i ostale lišine isprdile tiri u takujin ovega Grada, da ni čudo što nas Amerikani tako častu i kroju po nama mudante. Kako u takujin stoju soldi, kartice, osobna i slike od najdražih, od jake prdeži ovih navedenih, Korčula je u totalnoj komi. Dobro smo pasali, da po nama nisu nazvali kalcete.

Sve ovo što se događa, hoće reć kako sa Cvikon ni fermalo kakanje po Gradu, jerbo nas je odma iza tega kaki As Pametni i sad Amerikani sovin modnin programon, pa se ti Korčulo vadi.

Dohodi mi nikidan jedan Korčulani pod suncobran i govori kako ne viruje da iza ove Noći od muzeja stoji Noćno poduzeće Korčula. Ma vraga govorin mu, oli ne vidiš da se u nikakvu noć ne mogu sakrit ka hi sad kupi Uluz Alija su svojin jaranima. Jedino je ostalo armat obe postrojbe o Moreške i buduć oni najboje poznaju mrske Osmanlije vaja ih slušat i priko njih obranu formirat. Velu ulogu u tu akciju će odigrat bratska Žrnovska i druge općinske kunpanjije. Žrnovo je misto od četiri sela, ali ima jedinstvenu i složnu vojsku. Svi pušu u isti mih.

Najboje bi pasali da smo nikidan poslušali Noćurke iz Noćnega poduzeća i pošli zanoćit na Noć muzeja. Ka bi se probudili, svanuli bi doli digo blizu Bospora s turskin jarmon na škinji. Samo da rečen, ako su ovi Turci u svojtu našemu pokojnemu Ivici, onda no problem.

Interesantno kako je Korčula jedan smišan grad. Ima senpre četiri Asa, a svaku botu gubi ko od šale.

Slobodan Suncobran, 31. siječnja 2007.