Od velikih ludorija u gradu prvi put neznan jeli mi triba otvorit oli zatvorit suncobran. Kako je ove dane olavija zapeklo, vajalo je ipak otvorit tu vražju napravu. Korčulane ovih dana ni zapeklo samo od sunca, nego i od munadi što ih kontinuirano čini naše Poglavarstvo. Ovi put su zaminili stručnjake od prometa i naš dogradonačelnik je prestavi kako ćemo se ovo lito u centru napaćene Korčule zagropavat u jedan veli oktanski parangal. Evo da se ne reče da kritiziran bez argumenata, odma ću pridočit par spornih situacija u korčulanski prometni šesnaesterac koje bi mogle dovest do već viđenih kolapsa u Gradu.

Naprimjer, kad u sezoni isprid hoteli vaja doć autobus.O temu iako našemu dogradonačelniku na ruti pudoma nima govora ni spomena. E sad ni sporno što prid hotele dohodi ti autobus, nego već godinama on nima kroskle doć. Ona sadašnja cesta i pravac skojon dohodi više nikoga ne može zadovoljit. Ti se bus inkaštra na dilu ceste radi parkiranih auti i učini se tako lipa mužika od trubjenja, da to gosti dobro zapantu za cili život. Za našega dogradonačelnika to možda ni Korčula, pa ne govori ništa.

Ali vrag odni promet u Gradu, koji se nikad neće regulat dok se ne maknu veli brodi iz rive i ne prestanu šleperi prohodit priko grada. Važnije je ovih dana gledat stvarnega pobjednika ovih izbora doktora Androta Vlahušića. To je ovako jedan liberalni narodnjak, što mi je prin puno godina u Korčulu bi prišapja kako semi u Korčulu tribamo liberat ovih dogona i sami vazest uruke svoj Grad. Normalno misli je na Hercegovcei vlaje, pa san ga odma pita jeli i Španjoli i Francuzi imaju svoje Hercegovce oli vlaje. Reka mi je da to ni isto, našto san ja uskoči kako i ne može bit isto kad naši vlaji ne govoru španjolski i francuski.

Janbota posli ovih izbora ni potriba ni spominjat, jerbo se itako očekuje njegovo hitanje kamenjen protiv Matušića, pa bi se oni dvojica mogli hitat i duže vrimena, dok će za to vrime naš doktor, dičjega lica Vlahušić, kojemu prezime ni po vlaju, nego po svetemu Vlahotu, zapovidat u Županiji. Tako će se svin vlajima i hercegovcima tribat preispitat i revidirat imovina, da slučajno štogo nisu zamutili. Čuli smo što je na televiziju reka ti dotore o litnjin đirima turista po gradu. On se zalaže da stranci smidu u mudantine šetat po Sradunu, ulazit u muzeje i galerije, a kad budu hotili poć obać koji sakralni objekat, onda će in Vlahušić sbande Straduna osigurat» Krejanca servis», di će turisti za ne trčat pudoma moć nabrzinu obuć duge gaće i košuju i partit u razgledanje crkava. Ni precizirano smidu li ženske u tangama kurit po Stradunu, ali ako je judima ćef u mudantinama odat poštovanje dubrovačkoj kulturi nake se za to pobrine dotore od mudantini isličnih điri Andro Vlahušić.

Prošle setemane je na Brijune najavljena gospođa Budisavljević, pa iako se to ni dogodilo, Račan je izjavi kako je njemu najveći čovik Titele i najveća ideja samoupravjanje. Jebiga, ni čudo vazmeš pet naroda cirka 22 miljuna duša i samoupravljaš s njima pedeset godina. Onda doje rat, niko te ne lustra, osnuješ socijaldemokrate i pješćeš onemu vrimenu kad si bi mlad i blesav. Lako ti je tako bit samoupravljač.

Ali ni blesava šjora Vesna Piculinka. I ona je samoupravljačica i dobro je peškala. Tri glasa, dvi kantride, pet škanjeta i jedanaest ligenštuli. I to sve bez trgovine, jerbo ona ni trgovačka stranka. Sad ona i Picula predstavjaju sve ptičice iz gorice. Sanader je vidivši trostruki poraz shvati da prosječnega Hrvata ni briga za repertoar Milanske skale, koje patike nosi Šisel i zašto Merkelica nemože izgovorit riba ribi grize rep. Hrvate propito ni briga što se događa po hodnicima Brisela, nego više volu slušat Munižabu kako otvara paštetu na dnevniku uz pomoć Mislava i Danka Šprajca. Sandi se ni obada ko mu je skroji rezultate. To je učinila naša draga hrtovizija, pa su mu savjetnici ove dane šapnuli da je malo promiša i zavrti. Tako je isto učini Janša lateći sve komunjare iz Slovenske tv i niko mu iz Evrope ni reka slova. Valjda će to sad konačno učinit i Sanader. Judima su više dokokotali ovi livoruki ridikuli navijeni kontra desnice. Senpre nas krstu livon rukon.

Ali svragon livo i desno rekli su na izbore birači i učinili nami na jugu lipe seljačke veliku velikanu radost. A što, pita će kogo?

Zbrisali seljake s lica škoja i bliže okolice. Ajme meni gušta, a i pošteno da idu ća judi koji samo nesriću i pomutnju nosu. Ni narod zamantan, naročito Korčulani koji su u motiku odavna sparali i to s puno, puno tiri. Sad neka seljačine kopaju, ako hoću i nos.

Slobodan Suncobran, 24. travnja 2006.