| Promine
U novine od prošle setemane se vidi kako naš Ivica rabota pošteno. Prvo minja sebe pa onda neposlušne drugove dalmatinskih ćelija i kozna dokle će doć. Govori se, minjat će sve sekretare od Zadra do Dubrovnika, samo neće ove u Korčulu. E ti su mu toliko vridni, da bi on triba od njih štogod i naučit, a u najmanju ruku, ako se najidu, bi oni mogli sminit njega. I tako se na političku scenu u Državu sve ništo hoće minjat, pa vidimo hadeze bi minja članove Programskega vijeća za Hrtovidnicu, haenes se promini i poče falit da je treća snaga u Državu, i ne prominimo li mišljenje o Čačiću nećemo tako lako u integracije. Onda nike manje stranke bi minjale pregovarače za Evropu i svi se hoću nikako obnavjat i minjat, a samo mi u Korčulu stojimo na isto. Dobro triba reć da je u Poglavarstvo sa Duškoton ušlo malo majstrala iz Plokate, ali to ni dosta. Mi se u Korčulu tribamo prominit, naprimjer ko i Mesić. Sje Stipica na čelo samita u Zagreb, zapini se, promini kolur i zaveli okupjenima kako ćedu neglajsat ne budu li pomagali nerazvijene pri ulasku u Evropu. Nema više divjačkega kapitalizma, zavapi je Mesić, koji je sam sebi svrha. Mora bit kapitalizam sa socijalističkin i samoupravnin motima inače, jao ti ga Evropi. Onda se iza tega javi Branko Crvenkovski, pa Miloš Minić i falilo je još da nas o temu skupu izvjesti Ivana - Opaličević – Ladizubović – Vukadinović – Dragičević – Veličković i bilo bi ko u stara dobra vrimena. Imaju pravo hadezejci kad govoru kako nas je ta uvažena novinarka približila Beogradu dva ipo santimetra. Sad ćemo se i po ton pitanju morat prominit. Evo pišu novine da se i drug Tito bi prenu i prid smrt promini. Naveliko se šuška kako je bi zazva svećenika da ga ispovidi za počinak. Može bit, samo pari se da bi ta ispovid bila durala do nikidan, znajuć da je ima pun gepek griha. Prin bi reka da je na tu ispovid triba doć sabovac Fumić, jerbo on najboje prašta antifašističke ludorije i grihe. I nisan nego ovo napisa, kad ono javila se dvojica partizani iz Bosne i jauču da su se prominili. I čitan u novine, kad ono govoru da su se prin smrti odlučili prominit u jude i priznat klanja na Blajburg. Pošteno nema što, ali ne lezi vraže ni sve gotovo, jerbo toj dvojici Bosanaca ovo ni prva promina. Važnija je ona da su prvo bili ustaše pa su se prominili u partiđane i da to ni tako, nebi oni bili ni dospili u novine. Nebi smi niko bit zal i promislit da su njih dvojicu za nagradu radi promine poslali klat po Blajburgu. Ma neee, to ih je poslalo što su se eto judi zaželili malo promine. I da finin s malo bojin temama, moran se sitit ko se još promini ove dane, aha siti san se, to je bivši ministar od šalovanja Čačić. Više ni ministar, defešta se promini i sad je opet miljuner. Slobodan Suncobran, 18. listoada 2005. |
Evo, nikidan je Račan ko
predsjednik Nacionalnega odbora za nadzor pregovora sa Evropon poruči kako se moramo
prominit. Ovo je pizdarija godine. On govori da se triba minjat. Pa stvarno ću šenpjat
od tega prominjenega komuniste.