Kad čujen samo i rič od najgorega, najjadnijega i najzapušćenijega Noćnega poduzeća na Jadranu uvik je botilija bila puna smiha. I pliva tako ta naša botilija nazovi turizma godišćima, litima i zimama, tuču je marete one države, onda u novu Državu patnje sa izbjeglicama, pa privatizirat se hoće-neće i što sve tu napaćenu Firmu ni tresnulo. Jadno naše Noćno poduzeće, judima će doć tuga kad ga sutra kupi koji svitski ludalo bez pameti i poslovnega nosa. I da ne zaboravin reć oni koji ga kupi neka odma vazme u Švedske vojske jednu bateriju haubica i tresne desetak tiri pu Marine, jerbo je i radi nje spanje u te hotele postalo bezvezno i prid njima je toliko halavo more u koje se čovik nebi smi kupat.

Eto za uvod je dosta, a sad one prave riči koje i mirita nekad naše uzorito poduzeće u Gradu.

U vrime kad smo bili dica ako greš u kino poša si u Noćno poduzeće, ako greš na bale, opet greš u Noćno, ako greš vanka, a u to vrime ni bilo u Gradu kafići, opet si mora poć u Noćno i dalje ako ćeš štogo šesnega kupit greš u Turistički biro Marko Polo, oli Kina-šop, dakle opet u Noćno poduzeće i na kraju ako dica gredu na Redutu, opet vaja poć pod krov Noćnega poduzeća i u zadnje vrime su se razbucali pa na Dominče ako ćeš kupit kruh, uje i mliko isto vaja poć u Noćno poduzeće jerbo su učinili i butigu.

Još uvik je za izist koju dobru paštu, trokut, oli štrudel, obavezno poć a zna se u Arulu ili Noćno i tako in fali još samo butiga od auti, i namještaja. Kino salu smo in vazeli, Općinu skoro cilu, samo in još moramo vazest Noćnu zajednicu i hotel Korčulu. Onda smo slobodni ko tice.

Može bit komu smeta što ih senpre tako zoven, ali kako ćeš zvat čovika ako je pjan nego pijančina, tako i firmu koja senpre pizdi o noćenjima vaja zvat NOĆNO PODUZEĆE i šlus. I to san se zareka i tako ću govorit dok se ovi Asi ne maknu i oslobodu Grad od teškega jarma.

Da govorin istinu uviri san se nikidan na televiziju. U Opatiju se hitali cvićen, dilili plakete na sve bande, ministri, fešta, političari, Televizija. Opatija sva u slavju. Govorili da je hotel Park dobi nagradu i ja pritrnu, kad ništa, ono je Park hotel iz Rovinja dobi nagradu.

E jesan se ponada, ali zalud.

I tako da nastavin di san sta, ono firma koja rekli smo se bavi prodajon svega i svačega, a drobi samo o jednemu, vidiš da ništo nevaja. Slušan ove dane kako se 14 uglednih konpanija izvanka i Hrvatske tiskaju za kupit Hotelsko na Koločep.. Dakle reklo je na Dnevnik da momentalno nima jače i vridnije hotelske kuće u Hrvatsku. Znači kako san i predvidi, Hvar je iz sunčanega đira pa u hlad, opatijska Liburna je izbršketana, a Korčulansko Noćno je na vridnosti odprilike oko destak «ŠEVICA» oli kako smo ih ko dica zvali CENTI. Dakle daj desetak CENTI i nosi.

Čita san nikidan je Blato dobilo 208 000 kuna nepovratne pomoći radi elementarne nepogode. Bilo bi dobro da se i građanima Korčule dodili nepovratna pomoć od 200 000 kuna radi studeni oko duše što nan čini ovo jadno Poglavarstvo. Onih 8 000 obavezno dat Noćnemu poduzeću neka svaki misec čini skupštinu i neka govoru pizdarije i činu se judima smijat. Kad nimamo kazalište, onda nazovimo te skupštine po korčulansku. Kazin.

Slobodan Suncobran, 27. rujna 2005.