| Šćucanje Nova kvaka našega gradonačelnika.
Ako se kojin vragon dogodi da prvi put u povijesti Korčule propade gradska kesa, ja predlažen da se okrivi Sanadera i Šukera. Za Rohatinskega ćemo još vidit, ali sad su ova dva na tapet. Što bilo da bilo, judima ni jasno kako to Hrvatska vlada smi podilit solde a da priskoči Korčulu. Radi te drske i brezobrazne Vladine rabote, štrapacadu je ćapa lokalni hadeze i njegov timunjer jerbo su oni direktno krivi za veličinu buže kroz koju su iscurile proračunske kune. Ne prominu li Sandi i Šuki svoj kruti stav, Mirko bi ih moga tužit Slavku i to Liniću. Za sve ove gropade u ovih pet godina su krivi stari Korčulani i to zato što su ingvazdali ovako lipi znameniti i kulturni grad. Od tega je naš gradonačelnik već duže vrimena zbunjen, pa je zato zadnjih godina sve snage pribaci na kulturu, tako da smo dobili Poglavarstvo i u njemu političare, mahere za kulturu. To su živi kustosi, konzervatori, arhitekti, tako da ovima iz Dubrovnika više puti ni potriba ni doć. Naši poglavari oko pitanja kulture sve učinu sami i to uvik bez dozvole. Zapravo oni sebi dadu dozvolu ko i za ovu spomen ploču Partizanima prikomorcima na spomenik. Ne znan što bi reka ali ti čin je toliko aut, da to vaja odma razglasit svin novinarima neka doju u Korčulu vidit novi projekat našega gradonačelnika. Radi se o strašno skupemu zahvatu izgradnje Doma za šćucanje. To će bit jedinstvena ustanova na svitu i služit će isključivo za sjećanja uz šćucanje na stara dobra vrimena, pod vodstvon nekolicine vozača SABa kojima ni prestala šćucavica ni posli šezdeset godina. Dom će bit uređen od zbirke oružja dokumenata i ostalega što se sačuvalo iz tih vrimena kad je jahala zalud generacija, na koju naš gradonačelnik i Poglavarstvo senpre šćucaju. Tu će bit pohranjen i dil materijala koji nisu mogli stat u Gradski muzej a pripadaju dilu šćucavega razdoblja iz drugega rata. Radno vrime Doma za šćucanje bit će od devet ujutro do tri popodne, tako da se tu svi građani i judi dobre voje mogu iza obida doć našćucat do mile voje. Niki dični judi iz te generacije potaknuti livin trendovima u medijima i javnemu životu toliko su se u zadnju godinu molali o kraja da su počeli i nas neomrčene tanćat da i mi šćucamo. Niki su se bekali pa i dans svoju dicu uču da šćucaju na to slavno doba povijesti, koda ni dosta što su nas starije po skuli maškaravali u ridikule, pa smo na satu domaćinstva i fizičkega morali šćucat za partizanima. Ne znan ali pari mi se da je Korčula jedini grad na svitu koji je friško peta spomenik partizanima i to usrid grada kako bi uz koju hotelsku zvizdu dobili i koji srp i korać više uz malo crvenila, kojega inače ugrad, za reć pravo fali. Da ovo cilo esdepeovo zanovjetanje i prenemaganje nebi sličilo na Smojetovu božićnu epizodu Malega mista, stavilo se ploču i ko ne viruje taman slučajno prin sam Božić. E kako bi bilo lipo kad bi drug Gradonačelnik poša u svoje vrhe, pa tamo šćuca i igra se na partizane i Njemce koliko ga je voja. A moga bi se i napit malo vode, može bit mu prestane šćucavica. Slobodan Suncobran, 8. ožujka 2006. |
Pa mu je s Marsa mali
proračun i to samo za preživit. Sad je nama neznalicama momenat naučit što je to
proračun. Normalno pomoć će nan gradonačelnik koji govori oporbi da mu ne fermaju
solde iz metropole, jerbo on ima žestoke projekte sa spljetskin graditeljima na čelu sa
Sikiricon. Kako to zločesti Sanader smi našemu Gradonačelniku odbit projekte, kad će
radi tega Korčula bankrotirat. Možebit Sanader ni zna da je proračun Korčule činjen
na soldima hadezeove Vlade, koja onako zločesta i nagovorena od lokalnih hadezejaca
nehoće dat našemu gradu solde. Jedino će financirat Muzej Marka Pola i to ako. Ma viš
ti njih a.