Evo ti ga na. Što ni od Korčule uspi učini Cvik, bome će vlaji s verduron na rotondi. Naš bi dogradonačelnik Maki reka, evo zločesti novinari čak iz Zagreba sramotu Korčulu. I ja govorin. Ma kako samo te jeftine novine smidu pisat o našemu Gradu tako brezobrazno. Kad ono i golubi na zidine znaju da su zato krivi Poglavari. Ka nima požari na škoju, što lipo ne donesu jednu cisternu pa ne štrcnu navečer rotondu svodon i operu te cijene srama napaćenoj Korčuli. U vezi tega u Metropolu je ove dane nasta veliki đunbus. Judi navalili isprid turističkih agencija uplaćivat lito u Korčulu.

Izaša san iz auta i niki me stari korčulanski turisti pripoznali. Pitaju ko s korčulanske rotonde piva u klapu Ivan Grozni. Ja govorin da neznan, samo niki puno sliču. To in je olakšalo i rekli su odma ka gredu u Korčulu na rotondu, da će petat vokmen nauši, slušat Groznega i pivajući po rotondi, kupovat verduru po dvista kuni za kilo. Čin san ču za ove nevoje, spakira bržeboje bursu i livonagibnin vlakon i katamaranon, priko Prigradice dolanpa doma. Na rivu čejadi, koda smo došli iz Australije. Propito mi neugodno i ćapala me nika straha izać u svoj Grad. Mislin, može me kogo i zabatajat srpon i koraćon, što ja znan. U najgori slučaj san moga ćapat iza kantuna poluosovinu od Fergusona po tanburi.

Ništa, dohodin doma i iman što vidit. Gomila pisama obožavateja i obožavatejica, stoju nasrid trpeze. Otvaran jedno po jedno i odma vidin najveći problem. Večina ih pocrvenila o partije i hoću hitno doć pod suncobran istrest što hi tišti.

Normalno da niman toliko vrimena svih primit, ali suncobran će bit dok san par dana ode senpre otvoren, pa neka doje koga je voja. Samo ode sad ponavjan. Neka mi ne dohodu oni što su pocrvenili osrama, oli osunca, jerbo jin neznan pomoć. Sad tako, a da ne zaboravin, mogu mi do i oni kako i Tino za kojega mi je jedan visoki neimenovani dužnosnik Gradskega Prezidija šapnu da je stavi traktor samo u ler, ma ga još ni skroz zgasi. Dakako partija se idaje osipa i pari mi se bliži se the end. I tako dok se mi gledamo u novine na naslovnice, Dubrovnik priko instalirane furešte kamere, gleda cili svit i to uživo.

Ja bi lipo instalira kameru na Fortecu, pa neka judi gledaju i nas, jerbo smo siguro puno puno zanimjiviji od Straduna. Koji bi to bi Yu tubet od programa, majko moja, mogu samo zamislit. Di neće bit zanimjiv grad u koji bi vajalo dnevno pisat baren dvi kolumne, di se događa toliko ludorija da je ono su rotondon tek na repu svekolikih korčulanskih budalarija. I tako ove dane šetan Gradon i vidin dominiraju zalogajnice picerije i kafići. Korčulani kontaju da je došlo vrime turista Bunkulovića. I dok su drugi graduni namoru pokrenuli vridne festivale, mi se u kulturu još koprcamo sa već viđenin koncertima Lukija, Ivanke i Nikše, pa Zagrebačkega kvarteta, ali vridnija kulturna događanja nikako da nan padu napamet.

Vodice se tresu od pribranih đezera, Trogir je učini fest od filmske glazbe, jedinstven u Evropu, na Pagu vrhunska ozbiljna glazba, Rabjani magistru ukrali i primodifikali festival viteških igara, a filmski fest u Motovunu da ne spominjen. Samo Korčula idaje obada Mirkota, Makija i Buraću. Pešest godišć in govorin neka gredu pudoma, oni nikako. Zato hi sad malo pomalo napušćaju vjećnici, a kad će past Poglavarstvo, ne zna se. Ala dobro, zna se i je da As Jonski zapovida Gradon, ali nima veze, naš je gradonačelnik još mlad i nezna baš sve buže po gradu. Ni mi jasno što Korčulani ne vazmu jedan čenpris i dobro ove poglavare ne izbaharaju po korbanima i zalatu pudoma.

I deboto san zaboravi kako san točno napisa da će Kinezi priko Korčule nahrupit u Evropu, ali da će to bit priko pisme i vina na Marko Polo festu, nisan ni sanja. Za ne falit, enološki fest, zvukova Defora je pasa granice Korčule i smanta kineske fanove lakih korčulanskih nota. Sad ka je pobjedi oni Kinez kojemu ne mogu izgovorit ime, Iveta očekuje važna kineska turneja. Meni po motu Ive i sliči malo na Marka Polota, samo bi mu savitova, ka gre pu Kine, neka sasobon obavezno vazme Poglavare. Ka doju u Peking, neka hi lipo odvede u Zabranjeni grad i tamo zabrani Kinezima da hi molaju baren dvaest godišć. Korčula će onda postat slobodni grad kako je oduvik bila i izgrada bi se makle kadene, ranpe, pauci, građevinari, koncesije, betun, asfalt i sva živa i neživa smijurija što je partija ovih godina prosula po našemu malemu mistu. A možebit onda pojeftini i konjak. Seljaci bili pa vidili.

Slobodan Suncobran, 6. kolovoza 2007.