Asti vraga koja nevoja. Prin me zva jedan stariji ozbiljni čovik i blenu mi na telefon da je Maki da ostavku na misto dogradonačelnika. Znači Maki je zgasi svoj traktor i reka ostalemu GRADSKEMU seljaštvu da oru sami. Čeka malo, a kako će sa ratni drug Mirko orat bez Makija? Kako će Grad sad funkcijonat ako, recimo u prometu što zašteka?

Ala danu neka županijska partija da tu koncesiju našemu Makiju i neka ne paniču. Oli ni domaći čovik i boje da on rabota nego koji izvanka.

Dobro, ja isto virujen u seljačku slogu i triba u gradsku Vlast bit kogod iz Korčule, koji baren zna di je Limunjera i Stranske banje. Inače da se mene pita, ja bi kako i biranje lokalne samouprave i gradonačelnika, stavi zakon da lokalna zajednica bira i koncesijonare, a ne da budemo u ti dil politike pod okupacijon Dubrovnika, oli nedaj bože Države. Sve što se može odlučivat u Korčulu, neka se odlučije, ovako smo i daje pod paskon Straduna.

A sad o kulturi. Jutros se na Televiziju javila ravnateljica konzervatorskega odjeljenja Ministarstva kulture iz Imotskega. Odma san šenpja i to ne što je apena Imotski dobi ti odjel, nego što ga nismo dobili mi. Osin ravnateljice Graskega muzeja u Korčulu, za tu stvar se triba rukama i partijon borit drug Mirko. Neeee, on se bori za Privrednu banku, jerbo će nas to skapulat. Što više banaka ugrad, to boje narodu. Međutin izgleda je on kulturu pripusti Buraći, koji sad ima vezu u Muzej, dakako pa se na oti plan ne događa ništa. Ovako su Imoćani lipo ni krivi ni dužni dobili instituciju i baš hi briga. Da se ni kogo usudi se rugat da su vlaji, prosjaci i sinovi, jerbo to ni tako. Oni su vridni i pametni i boru se za svoj grad. Oni su svoju aferu o drogi utišali za dva dana, a naša je durala ko sapunica.

Za to vrime se mi bavimo turizmon, pardon noćenjima, ali po viziji Asa vlaškega, koji je zacrta da svaki hotel vaja imat bazen i šlus. Nijedno misto na svitu o tri ipo tisuće judi nima više bazeni od Korčule. Mislit će stranci da se judi puno ode topu, pa se bazeni činu iz edukacijskih razloga. Po meni to se događa jerbo su naši Asi ništa drugo nego vizijonari i ako triba, bezen će dobit svaka institucija ugrad i puklo di puklo. Uvik san govori da nan ugrad fali banaka i bazeni. Tin ulaganjima će hoteli polako dobijat po zvizdu više, a grad po srp i korać manje.

Evo kad smo okolo banaka, zašto se Mediteranska i Privredna banka nisu dogovorili da in As vlaški, izgradi na krov od robne kuće jedan bazen. Moglo bi se i na Kapetaniju načinit jednega i blizu je Općina, a nebi se falilo ni na Fortecu pustit vodu.

I na kraju zašto se gradski oci nebi išli digo okupat na oti bazen na hotel Marko Polo? Neka lipo gredu, samo bi koga zamoli da in prin kupanja obavezno izduši kolo.

Slobodan Suncobran, 10. srpnja 2007.