Ćapalo Cvika! Berluskoni i Cvik su u jednemu slični. Imaju sriće sa zastarama. Oba nećedu u bajbuk, jerbo su in predmeti na Sud pošli u zastaru. To je mirakul, koliko je to postala važna i korištena rič.

Nikidan je Miloglav vrga prvega Asa, doduše onega od Pameti, ali ni ćapa vele punata. Same lišine. Sad bi mi Korčulani tribali čini kuco, jerbo je on ugledni građani, a mi mone, oli tukci. Brzo je uslidi demanti o podmetanjima pravosudnih moćnika koji su pari mi se našega Asa Pametnega ovi put pogodili drito u Centar, hoću reć u zastaru.

Za ove stvari koje se događaju, mi imamo jednu dobru izreku. Dakle, ni nas briga što Miloglav čini, nego što misli da mi to fumamo. Dakako da As ni sminjen što je zanemari Cvika, nego što je senpre zanemariva jedan dil predmeta. Koliko se samo judi žali na njega, ni potriba govorit. Koda mi neznamo da Miloglav, Karninčić i kumpanija nisu janjad, ma su oni sminili njega, a ne on njih. I Račanova Vlada ga je upozorila, gledajući pu Marije Skokandić, da se ćapa posla i to je bilo na Dnevnik dvi i druge godine. Sad se Korčulani podilili na dvi bande za i protiv, samo vaja pitat one u Dubrovnik, ko je zaguda ostalih osandesetak predmeti kontra Cvika.

Da se nebi mislilo da pokušavan branit Asa Pametnega, reć ću kako ga skupa s Tri Asa prozivan već četiri pet godina i to zato što mi ni po motu njegovo lobiranje za Marinu ka je bilo krajen osandesetih, onda skandalozno dosuđivanje Arsenala Medijatoru i muljanje oko kuće Marka Pola. Tu je po meni učini direktnu šćetu Gradu Korčuli. A i za virovat je da je savitova Asa Vlaškega, ka se knjiži na hotel Korčulu. S kojin moton, tribalo bi istražit. Kako može ti hotel pospugat As Vlaški vaja istražit. O trudu oko palače Arneri neću govorit.

I što bi se sad moglo dogodit? Da se ostala Tri Asa uzgoropadu i počmu se bavit zastarama ko i ovi. Izgleda mi u Korčulu tribamo više forsirat zastare i upotrebjavat hi u svoju korist, pa čak i institucijonalizirat. Po meni bi se zastara tribala koristit i u svakodnevni život. Naprimjer susid počme blizu tebe gradit kuću bez građevinske i ne pita ti suglasnost. Ti mu rečeš da ti zaklanja sunce pa ćete ti i žena brže zastarit. On te ne obada, nego udri šalovat i gradit bez dozvole. Lipo ga ćapaš, hitneš u mišalicu, a on te posli tega tuži. Sud te zazove na raspravu, a ti in pošaješ ljubavno pismo da ti je puno žal, ali je predmet zastari. Napišeš da si odavna sredi susida i stvar je zastarila.

Onda recimo doješ liti u hotel Korčulu, sideš na taracu i bleneš u sunčani Hvar. Naručiš dvista kamenica, botiju Postupa i sve popapaš. Posli naručiš još jednu botiju i taman kad Hvar pade u hladovinu, pokupiš prnje i greš ća. A platit, pita konobar. Ništa, rečeš mu, pošlo je sve u zastaru i partiš pudoma. Sa mi pada napamet koliko su šaraga, kamenica i šniceli As Vlaški i Lukavi poslali u zastaru.

Osin zastara na peškariju, rotondu i po butigama, najgora je zastara u glavu, oliti možjane. Za onu u gaćama neću govorit, jerbo je ovo krejani stupac. A oli ni i jedan vid zastare ovo što se događa Korčulanima i Dubrovčanima. Masa Dubrovčana je pošla u zastaru, jerbo dohodu svježe i nove snage iz Konavala. Tako se isto dogodilo i Korčulanima, koji brzo gredu u zastaru i minjaju hi mladi pametni i vridni judi iz Žrnova. Da je tako, govori činjenica da je jedini od Korčulana u politiku osta Čenpris. Ali i on će brzo u zastaru. Zapravo Korčulani su toliko zastarili da će in Žrnovci učinit i arhiv u Žrnovo, pa neka lipo gori gredu zastarivat. Korčulu triba molat pametnin, lucidnin i nadarenin Žrnovcima, kojih je fala bogu senpre pun internet.

Recimo kako se i naše Radijo defešta drži zastara. Dok su se oni ove dane obadali, ko ide i di su pala vrata, stvar je partila u zastaru. Propito su se tiskali ko će izvjestit o Asu Pametnemu, ali nima veze, oni su itako partijski bilten sveukupnue medijske gnjaške u Gradu.

Međutin ni baš sve zastarilo. Korčulanski komunjare siguro nisu. Oni daju ideju, tvornice i hoteli radnicima. Zašto? Zato da može živit ona stara, snaji se druže. A kako? Pa mazni štogo, ćapaj, drpi, snaji se. U duhu tega niki dan pišu novine da su iz Splitskega škvera radnici kroz kapiju iznili miljune. Iz našega korčulanskega uopće nisu. Ma ke. A ni konobari i kuhari nisu nika ništa iz Noćnega opaletali. Ma oli jesu. A što se može ka je to sve partilo u zastaru. Ka gledaš bivše korčulanske firme, jedino iz Zanatskega nisi ništa moga odnit doma. Bilo ga je lakše molat da zastari i krepa.

Inače kad se na politički plan govori o zastarama, odma se tu nameće moj znanac Mesić. Oni hrvatoidni Stipica je zastari i više ne može ni govorit, ali zato ovi novi, friško rođeni Mesić........e temu nima kraja. Tek se rodi i još nima ti mali Meski ni desetak godišć, a već je predsjednik, gre po svitu, govori monade ima pametne savjetnike i sad će taman po u sridnju skulu. Mlad je ti naš tek rojeni Predsjednik, nika neće umrit a čini mote od doživotnega mandata. Ka su ga pitali što je bi prin, jeli bi isto Mesić i u oni život, reka je da se ne sjeća i čini mu se, to je sve skupa zastarilo.

Slobodan Suncobran, 22. siječnja 2007.